Putty Aur Plaster Mein Kya Farq Hai? Ghar Ki Finishing Ke Liye Zaroori Guide
 |
| Putty Aur Plaster Mein Kya Farq Hai? Ghar Ki Finishing Ke Liye Zaroori Guide |
Ghar banana har kisi ka khwab hota hai, lekin is khwab ko haqeeqat mein badalne ke liye construction ke mukhtalif marhalon ko samajhna bohot zaroori hai.
Bahut se log confusion ka shikar hote hain ke plaster aur putty mein asal farq kya hai aur ghar ki finishing ke liye in dono mein se kaun sa amal zyada ahem hai?
Aaj ki is post mein, hum tafseel se baat karenge ke plaster aur putty kya hain aur yeh aapke ghar ko professional look dene mein kaise madad karte hain.
Plaster Kya Hai?
The Gray Structure Foundation
Plaster construction ka woh bunyadi marhala hai jo brick ya block work ke baad kiya jata hai. Jab diwar khari ho jati hai, toh woh dekhne mein khurdari aur na-hamwar hoti hai.
Plaster ka maqsad diwar ki un khamiyon ko chupa kar usay ek mazboot aur barabar gray structure dena hota hai.
Plaster ke liye ek mahir mistri ka hona bohot zaroori hai. Plaster jitna mazboot aur level mein hoga, aapke ghar ki buniyad utni hi mazboot hogi. Plaster diwar ko ek uniform look deta hai aur usay bahar ke mousam ke asraat se mehfooz rakhta hai.
Agar plaster mein kami reh jaye, toh baad mein ane wale tamam kaam, jese putty ya paint, kharab ho sakte hain. Isliye, plaster ko kabhi bhi nazar-andaz nahi karna chahiye.
Putty Kya Hai?
The Modern Aesthetic Touch
Putty plaster se bilkul mukhtalif aur agla marhala hai. Jab plaster mukammal aur khushk ho jata hai, tab putty ka kaam shuru hota hai. Putty ka asal maqsad diwar ko glass ki tarah smooth aur mulayam banana hai.
Putty ka kaam diwar ki mamooli se mamooli dararon aur khurdare pan ko khatam kar ke usay ek professional aur modern look deta hai. Putty wala ghar dekhne mein bohot zyada neat aur clean lagta hai.
Aaj kal ke modern gharon mein putty ka istemal lazmi samjha jata hai kyunke iske baghair paint mein woh shaning aur finish nahi aati jo ek modern ghar ki demand hai.
Putty aur Plaster Mein Bunyadi Farq
Purpose: Plaster ka maqsad diwar ko mazbooti dena aur usay seedha karna hai, jabke putty ka maqsad diwar ko chamakdar aur smooth banana hai.
Timing: Plaster brick work ke foran baad kiya jata hai, jabke putty plaster ke sookhne ke baad ki jati hai.
Material: Plaster cement aur ret (sand) ke mixture se banta hai, jabke putty powder form mein hoti hai jise pani ke sath mix kar ke paste banaya jata hai.
Appearance: Plaster diwar ko gray aur tough look deta hai, jabke putty diwar ko white aur velvety finish deti hai.
Putty ki Life aur Maintenance
Bohat se log sawal karte hain ke kya putty lambe arsay tak chalti hai? Iska jawab hai: bilkul! Agar putty ek achay aur tajurbakar karigar se karwayi jaye, toh iski life bohot achi hoti hai. Putty ki life ka daromadar is baat par hai ke aapne putty se pehle primer ka istemal kaisa kiya hai aur sanding (sand paper ka istemal) kitni bariki se ki hai.
Jab putty ke opar proper steps ke sath rang (paint) kiya jata hai, toh yeh salon tak kharab nahi hoti.
Professional Look Ke Liye Tips
Agar aap chahte hain ke aapka ghar kisi mahange hotel ya model house jesa dikhe, toh in baton ka khayal rakhein:
Plaster ko hamesha acchi tarah pani (curing) lagayein taake woh mazboot ho.
Putty ke liye hamesha achi quality ka powder istemal karein.
Sanding ke liye 220 number sand paper ka istemal karein taake finishing mein koi line ya nishan baqi na rahe.
Putty aur paint ke darmiyan primer ka istemal lazmi karein taake paint ki shaning barqarar rahe.
Conclusion
Mukhtasar yeh ke plaster ghar ka "Skeleton" (dhancha) hai aur putty ghar ka "Face" (chehra) hai. Dono apni jagah par bohot ahem hain. Plaster ke baghair mazbooti nahi mil sakti aur putty ke baghair modern look mumkin nahi. Agar aap mazeed janna chahte hain ke putty aur plaster step-by-step kaise kiya jata hai, toh hamare blog par majood tafseeli guides zaroor visit karein. Wahan aapko har step ki bariki se samjhaya gaya hai.
Frequently Asked Questions (FAQ)
Q1: Kya plaster ke opar direct paint kiya ja sakta hai?
A: Haan, lekin us se woh modern finishing nahi milti jo putty ke sath milti hai. Plaster ke opar putty karna hi professional tarika hai.
Q2: Putty karne ka behtareen waqt kaun sa hai?
A: Plaster mukammal taur par khushk ho jaye, tab putty shuru karni chahiye.
Q3: Kya putty mehngi parti hai?
A: Putty aur paint ka material thora mehnga ho sakta hai, lekin yeh ghar ki value aur khubsurti mein bohot izafa karta hai.
Q4: Plaster ke liye mazdoor ki zaroorat hoti hai ya mistri ki?
A: Plaster ek technical kaam hai, isliye iske liye hamesha ek mahir mistri ki zaroorat hoti hai.
Umeed hai is post ne aapki putty aur plaster se judi tamam confusion khatam kar di hogi. Mazeed construction tips ke liye hamare sath jure rahein!
0 Comments