Block Work Mein Hone Wali 10 Aam Ghaltiyan aur Unka Hal: Professional Guide
 |
| Block Work Mein Hone Wali 10 Aam Ghaltiyan aur Unka Hal |
Aaj ki is post mein, main Muhammad Usman aapke sath block work mein hone wali 10 aam ghaltiyan aur unka professional hal share kar raha hoon.
1. Daga (String Line) Ka Dheela Hona
Block work mein sab se ahem cheez "Daga" ya string line hoti hai. Aksar mistri jaldbazi mein daga tight nahi bandhte, jis ki wajah se layer mein "lachak" (sagging) paida ho jati hai aur diwar seedhi nahi banti.
Hal: Hamesha achi quality ka daga istemal karen aur usay itna tight bandhen ke us mein zara barabar bhi lachak na ho.
2. Shawal (Plumb Bob) Ka Istemal Na Karna
Shawal ke baghair diwar banana ek bohot badi ghalti hai. Agar shawal ka istemal na kiya jaye toh diwar uper se terhi ho sakti hai, jis ka pata paint ke waqt chalta hai.
Hal: Har nayi layer (war) par shawal check karna ek professional mistri ka farz hai.
3. Masalay (Mortar) Ki Galat Thickness
Masalay ki layer na bohat zyada moti honi chahiye aur na hi bohot patli. Bohat moti layer block ko settle hone mein mushkil karti hai aur patli layer pakar (bonding) nahi banati.
Hal: Masalay ki thickness hamesha 1 cm (normal) rakhein taake block ki pakar mazboot rahe.
4. Cracked ya Toote Howe Blocks Ka Istemal
Kuch log paisa bachanay ke liye toote ya dararon wale blocks laga dete hain. Yaad rakhein, ek crack wala block poori diwar ki structural integrity ko kamzor kar deta hai.
Hal: Hamesha saabit aur mazboot block hi istemal karen. Toote hue blocks ko fenk dein ya unka istemal sirf chote hisson mein karen jahan load na ho.
5. Bunyad (Foundation) Ki Gehrayi Mein Kami
Saudia mein bahr wali diwaron (boundary walls) ke liye kam se kam 30 se 40 cm tak zameen ke andar khudai lazmi hai. Aksar log oopar-oopar se diwar shuru kar dete hain, jo waqt ke sath zameen ki settlement ki wajah se jhuk jati hai.
Hal: Boundary wall ke liye 40 cm tak gehri foundation banayen. Agar foundation mein RCC lanter dala jaye toh yeh sab se best hai.
6. Joints Ka Sahi Na Hona
Blocks ke darmiyan gaps chor dena ya joints ko masala se sahi tarah fill na karna diwar ki mazbooti ko khatam karta hai.
Hal: Block ko hamesha dusre block ke sath mila kar lagayein aur joints ko masalay se achi tarah pack karen.
7. Foundation Par Tawajo Na Dena
Ghar ki diwaron ki bunyad agar mazboot nahi, toh oopar ki diwar jitni marzi achi bana lein, woh kabhi stable nahi rahegi.
Hal: Diwar banane se pehle bunyad ko level aur solid banayein. RCC foundation ka istemal lamba arsa chalta hai.
8. Outer Walls Par Tawajo Na Dena
Aksar mistri andar ki diwaron par tawajo dete hain aur bahar ki diwar ko "chal jayega" samajh kar neglect kar dete hain. Yaad rakhein, bahar ki diwar sab se zyada mousam (heat/wind) ka samna karti hai.
Hal: Bahar ki diwaron ki mazbooti par zyada focus karen aur material ki quality par koi compromise na karen.
9. Masala Galat Mixture Mein Banana
Masalay ka ratio (cement aur ret) agar sahi na ho toh pakar nahi banti. Block work ke liye 1:2 ka ratio best hai.
Hal: Masala hamesha measurement ke sath banayein, andazon par kaam na karen.
10. Discipline aur Professionalism Ki Kami
Construction ka kaam discipline maangta hai. Agar aapka kaam mein focus nahi, toh ghaltiyan hona lazmi hai.
Hal: Poori diwar banate waqt tawajo se kaam karen aur har layer ko double check karen.
Conclusion
Saudia mein kaam karte hue hum ne seekha hai ke "mazbooti" hi sab se bari kamyabi hai. Upar di gayi 10 ghaltiyan aksar kaam ke doran ho jati hain, lekin ek professional mistri wahi hai jo in ghaltiyon se bachay. Block work mein perfection, achi foundation aur sahi material ka istemal hi aapke ghar ko saalon saal tak qaim rakhta hai. Hamesha koshish karen ke aapka kaam bolay, aur jab malik ya thekedar aapka kaam dekhe toh unhein aitmaad ho ke yeh kaam mazbooti ke sath hua hai.
Frequently Asked Questions (FAQ)
Q1: Block work ke liye best ratio kya hai?
A: Block work ke liye 1 hissa cement aur 2 hisse ret (1:2) ka ratio best hota hai.
Q2: Saudia mein boundary wall ki foundation kitni gehri honi chahiye?
A: Saudia mein kam se kam 30 se 40 cm tak zameen ke andar khudai lazmi hai.
Q3: Kya toota hua block lagaya ja sakta hai?
A: Nahi, toota ya crack wala block diwar ki mazbooti ko khatam kar deta hai.
Q4: Block diwar ko seedha rakhne ka best tariqa kya hai?
A: Achi quality ka daga (string line) tight bandhna aur har layer par shawal (plumb bob) check karna best tariqa hai.
Umeed hai yeh tips aapke kaam aayengi. Construction se related mazeed sawalat ke liye hamare blog Riylo.com ke sath jure rahein!
0 Comments